Þá er kominn nýr formaður í Framsókn, ég held að sumir þeirra sem hafi aldrei ætlað að kjósa þann flokk muni kannski hugsa sig um ef að kosningar verða á þessu ári.  Ef að flokkurinn hefur vit á að losa sig við þessa gömlu þingmenn og alla fylgifiskana sem flestir hverjir eru glæpamenn og eiga heima á ,,verri stöðum”, ég nefni engin nöfn en Finnur blessaður Ingólfsson ritast ósjálfrátt hérna á skjáinn.  Það verður gaman að fylgjast með þessu öllu.  En ég held að það gæti verið vit í honum Sigmundi, en það kemur pottþétt í ljós…fær hann atkvæði mitt….veit ekki!  Samt alveg magnað að skrá sig í stjórnmálaflokk sem er  n.b. elsti stjórnmálaflokkur Íslands og verða formaður hans mánuði síðar. 

Annars er það að frétta að ég hef tekið mér oggulitla pásu frá námi, það er svo gaman að hafa smá tilbreytingu í þessu.  Ég fékk gömlu vinnuna mína aftur og sló bara til, svo er bara vona að maður haldi henni, haha

Það eru kostir og gallar við allar ákvarðanir, en mig langaði þetta meira og gerði það því.  Það fer vel um mig hérna á norðurlandinu og sakna ég ekki brauðhleifsins í Noregi sem ég borgaði 450 ísk krónur fyrir.  En ég stefni nú að klára eitthvað nám og eins og staðan er nú þá mun ég stefna út síðar til frænda minna í Noegi.  Helsti söknuðurinn felst í fólkinu sem ég kynntist þar og gaman að segja frá því að þá er ég aðallega að tala um þá íslensku námsmenn sem ég kynntist þar.  Þá tróna á toppnum Hrafnhildur og Ragnar í Ási sem maður hitti hvað oftast og ég þekkti fyrir þessa frægðarför, en ég hitti þau bara síðar og hina líka

En ég er sem sagt á Íslandi og hef það gott.  Ætli ég skrifi ekki eitthvað á þessa síður svo framarlega sem að einhverjir heimsækja hana og ég hafi eitthvað viturlegt að segja.

H

Þá líður að lokum, lokum ársins allavega. 

Þetta var fínt ár!  Árið sem er að líða hefur verið mjög gott og skemmtilegt. 

Það sem hefur m.a. gerst á árinu eru:

Okkar fyrstu íbúðarkaup,

1/4 af þessu námi lokið

Búinn að prufa að búa í miðborg Oslóar, einhverjir kostir og margir gallar,

Léttist ágætlega á árinu, þökk sé námsmannadvöl Osló og Lín, þeirri fáránlegu stofnun…en þessi kg vilja sem sagt óðum koma aftur

Er heilbrigður og líka þeir sem kringum mig eru, líður vel og er glaður

Hitti marga góða félaga og átti góðar stundir með fullt af fólki.  Það er alltaf gaman að hitta gott fólk, en stundum vilja annir hjá öllum aftra því að maður hittist, en það er kannski sniðugt að hafa það sem markmið fyrir næsta ár að rækta fólkið betur.  En það verður líka að hafa frumkvæði á móti.

…og margt fleira mætti telja upp….

Þeir sem hafa áhuga að vita meira um mig og mína, það sem gerst hefur og það sem á eftir að gerast, geta endilega hringt, sent tölvupóst eða hitt mann.  Það er alveg óþarfi að hafa þetta nánara á einhverju bloggi sem allir geta lesið, ekki satt?

Gleðilegt nýtt ár kæru vinir og megi næsta ár verða ykkur skemmtilegt og gott.  Vonandi að ég hitti ykkur öll á næsta ári, þá eru allir velkomnir í heimsókn á Dallas city…það þarf ekki að bjóða fólki formlega…þeir koma sem þora og vilja, haha.

Nýárskveðjur frá Dalvík,

Helgi

Halló, Halló

Það er sko nóg að gera hjá okkur þessa dagana, eins og hjá flestum, en þetta er allt voða gaman.  Því er best að vera ekkert að flækja þetta: 

Gleðileg jól og hafið það öll sem best um hátíðarnar!

Jólakveðjur,

Helgi

Látum snjóa hérna, hóhóhó.

I’m back!  Ég hef ekki verið í sambandi við umheiminn undanfarna daga, vegna lærdóms, en er allur að koma til.

Þá er þessari fyrstu önn af fjórum lokið í þessu námi: 25%, 1/4,  2/8, 4/16, 8/32, 16/64 o.s.frv   Á tímum hélt ég að þessi dagur myndi aldrei renna upp en hann gerði það og þvílíkur léttir.  Framtíðin er þó óráðin, hvað gerist á nýju ári….kemur í ljós.

En ég er sem sagt búinn að skila verkefninu stóra og einnig flytja það, en það var gert í dag.  Okkur Vigni gekk vel með þetta og small allt saman á endanum eftir miklar vökunætur og smá stress, en gaman að þetta heppnaðist allt vel.

Því er kominn smá þreyta í mann þar sem að svefninn undanfarið hefur frekar verið í blundarformi.  Eftir 4 tíma þurfum við að leggja á stað út á flugvöll og fljúgum til Köben og komum svo heim um kl 15 á morgun með Iceland – Express.  Þannig að það er réttast að ná smá svefni núna. 

Það verður svo óendanlega gaman að koma heim að það hálfa væri nóg.  Helga mín kemur svo suður á fimmtudag þannig að þetta veruð skemmtileg helgi og mikið að gera.  Ég ætla því að fagna aðventunni þessa helgina með mínu fólki þar sem að ég hef ekki haft tíma í það til þessa, haha.

Jæja ætla ekki að hafa þetta lengra, tjái mig betur síðar.

Hafið þið það óendanlega gott.

Helgi hamingjusami!

Þær eru 12, 15, 16 & 18.

Þetta eru mikilvægustu dagsetningarnar í desember sem ég tel spenntur niður í og renna upp eftir 3, 6, 7 & 9 daga.

Þann 12ta skilum ég & Vignir verkefninu okkar sem er endalaust.

Þann 15da þarf svo að kynna þessa vitleysu.

Þá kemur að því,þann 16da flýg ég til Íslands, sem verður kærkomið.

Loks mun ég hitta hana Helgu mína þann 18da……þá er líf mitt fullkomið og tíminn má hægja töluvert á sér þegar sá dagur verður runninn upp.

Annars á ég að vera á fullu að læra, þannig að þetta verður ekki lengra

Þegar ég var í eitt af mínum fyrstu skiptum á Dalvík, áður en ég flutti þangað, þá heyrði ég í ísbílnum.  Ók hann um þennan litla fína bæ hringjandi bjöllu sinni.  Þetta þótti mér merkilegt þ.e.a.s. að ísbíllinn færi í þéttbýli landsins, þar sem að ég mundi ekki að hafa séð hann keyra um götur Hafnarfjarðar á mínum uppeldisárum.  Ég mundi bara eftir að hann hefði komið þar sem ég var í sveit um tíma og svo um sumarbústaðarsvæði.  Helgu minni þótti örugglega borgarmalbikið geysla einum of mikið frá mér þar sem að mér þótti þetta afar merkilegt, en henni hefur tekist að kroppa smá af þessu malbiki af og klínt möl á mig í staðin.

Jæja núna bý ég nánast í miðborg Osló og í hverju heyrði ég áðan.  Jú ísbílnum, hann keyrir hérna um allar götur eins og óður sé þann 2. desember takk fyrir.  Ég hef heyrt í honum með reglulegu millibili í allt haust og þótt stórmerkilegt að þessi blessaði bíll fari hérna um allt, þegar búðir eru á hverju horni.  Þá er nú annað merkilegt, ísbílinn á ferð í dessember!!! Þá skil ég ekki að einhver kaupi sér ís í byrjun desember, þegar fólk á nóg með það að halda á sér hita, nema kannski litlu börnin.

Er ekki rétt að fá smá jólaútlit á þessa síðu þar sem að aðventan er að hefjast? 

Þá er þessum mánuði brátt öllum lokið.  Hann var fín og einstaklega fljótur að líða, mjög glaður með þessa 30 daga :)  Hlakka þó enn meira til þess næsta.

Ég hef bókað flug til fagra Íslands þann 16. desember (þriðjudagur).  Ég mun fljúga með Norwegian til Köben og þaðan með Iceland-Express til Íslands.  Með þessu sýni ég vanþóknum mína á Okurleiðum í þetta skiptið (á þó mjög líklega eftir að versla við þá aftur, enda ekki mikið úrval í boði).  En ég hefði hvort sem er ekkert komist beint frá Osló til Íslands með Okurleiðum, þar sem að vélin var ,,full”, þá bjóða þeir upp á flug til Köben með Sas og þaðan með vél sinni til fyrirheitna landsins.  Þannig að ég er mjög sáttur með þessa áætlun mína.

Skólinn gengur vel og allt á áætlun þar, eins og er, en það er nóg að læra…sem er ágætt.

Þá vitið þið þetta….eitthvað fleira sem þið viljið vita?

Kærar kveðjur, Helgi

Það er eitthvað um neikvæðni sem kemur inn á þetta blogg þessa dagana, því miður, en brátt verður breyting á því

EN nú er mér öllum lokið, vitlausara bankakerfi hef ég ekki kynnst og eiga þessir Norðmenn að fá orðu fyrir hægfara kerfi, þröngsýni og órökréttann hugsunarhátt.

Það er nefnilega svo að ég þarf að borga síðustu leiguna, sem er nota bene ekki ódýr.  Ég var búinn að taka út peninga í mörgum umferðum í hraðbanka og loks kominn með upphæðina sem er á annað hundrað þúsund krónur, þökk sé íslensku krónunni.  Kallinn alltaf jafn góður í viðskiptum.

Þá vildi leigusalinn minn að ég myndi millifæra í þetta skiptið því hann var í heimsreisu og hefur líklegast aldrei haft það betra í lífinu, enda með með Íslending í vinnu til að skaffa nautasteikurnar ofan í belginn á manninum.

Ég fór með peningana, í feitu umslagi, í bankann í gær.  Nei því miður getur þú ekki lagt þá inn hér, þú verður að fara í bankann sem hann er viðskiptavinur í.  Ég átti ekki orð yfir þessum stælum en sá þá ekki fyrir í hverju ég myndi lenda í sólahring síðar.

Var núna að koma úr blessuðum viðskiptabankanum sem var hinn rétti.  Stelpan rétti mér svakalegt blað sem þurfti að fylla út til þess eitt að geta gert þetta.  Ég skrifaði og skrifaði…..en svo kom orðið sem ég vildi ekki heyra: NEI.  Af því að ég er ekki með reikning í þessu risaeðlulandi þá get ég ekki lagt inn pening, það verður að millifæra svona.  Ég spurði hvort að ég gæti virkilega ekki lagt pening inn á reikning í öllu landinu….nei það getur þú ekki líklegast ekki.  Hún gat lítið sagt þegar ég sagði henni að bankakerfið hér í landi væri það vitlausta af öllum kerfum sem ég vissi um.

Því verð ég að gera það sem ég hefði betur gert í byrjun, hefði ég vitað að kallinn væri í Kambódíu, að láta millifæra þetta frá Íslandi.  Þetta þýðir það að ég sit núna á seðlum sem telja á annað hundrað þúsund og hef ekki hugsað mér að nota í þessu landi, nema kannski 10% af þeim.  Núna fer ég með bænir og vona að gengið versi alveg svakalega þegar íslenska krónan verður sett á flot og verði svoleiðis í einhvern tíma…..því þá get ég skipt þessum peningum í íslenskar krónur þegar ég kem til landsins og grætt tugi þúsunda.

….þarf því að fara að halda áfram að vona það versta……..bestu kveðjur H.

Mér þykir nokkuð sérstakt að hér í Osló er ekki eitt jólaljós komið upp, allavega hef ég ekki séð þau.  Nú er tæplega mánuður til jóla, en líklegast er þetta fólk ekkert að bruðla með rafmagnið.  Kannski verið að bíða eftir aðventunni…..

Bara geðveikt fyndið………

Það styttist í tíma gleði og friðar!