Ein staðreynd sem ég þurfti að horfast við í þýskalandsferðinni var að mér líkar ekkert of vel við að vera í of mikilli hæð.  Hingað til hef ég nú ekkert flokkað mig sem lofthræddan og geri það ekki enn, engu að síður er ég ekkert mjög spenntur fyrir óþarfa príli.  Það var nefnilega farið upp í þrjá turna á þremur dögum, en þrjóskan kom mér upp í tvo þeirra og sé ég ekkert eftir því. 

Fyrsta mannvirkið sem farið var upp í var einskonar pýramídi, byggður á gamalli kolanámu.  Það tók ekki nema tveggja klukkutíma göngu í rigningu að finna þetta blessaða mannvirki (sumir hefðu kannski orðið vel pirraðir á því ferðalagi   Til þess að komast upp að mannvirkinu þurfti að fara upp lengsta stiga sem ég hef farið eða 370 tröppur.  Miða við uppstig 16 cm þá er hæðin 59,2 m sem jafngildir ca.  24 hæða blokk, en hva það var ekkert mál….maður er kominn í svona ágætt form eftir alla gönguna í Osló.  Þegar upp var komið var farið að rökkva og vindurinn lék um stálbitana og vírana þannig sumum stóð ekki á sama.  Þessi staður var lokaður og hafði verið bundið fyrir gönguleiðina, en það stoppaði þessa galvösku félaga ekkert í því og ég því á eftir, enda stoltið í húfi.  Á leiðinni upp velti ég því fyrir mér af hverju þetta var lokað, voru einhverjar rær lausar, ætli þetta hrynji, ef það myndi hrynja þá fengi ég ekkert að borða í kvöld og dæmið fullkomnaði ég með því að líta niður í gegnum grindargólfið þegar ég var hálfnaður upp.  Þá ákvað ég bara að bíða þar, glaður með að vera kominn í þessa hæð, enda mjög svangur

Næsti turn sem við fórum í var gamallt gassíló.  Inn í sílóinu hefur verið útbúinn sýningarsalur með mögnuðum loftmyndum o.fl.  Fyrir ofan sýninguna var önnuð hæð þar sem að fólk gat lagst og horft upp í turninn, sem hafði verið lýstur upp með daufri lýsingu og svo var geimverutónlist sem lék um salinn ásam bergmáli fjöldans.  Að innan var hægt að taka lyftu upp um ca. 80 m og fara þar út, úff það var smá sjokk.  Þá þurfti maður að labba upp um 20 metra á topp sílósins sem og var maður því í um 100 m hæð.  Þvílíkt útsýni.  Eitt af því sem ég gat þó ekki hætt að hugsa um voru menninir sem byggðu þetta, festa ró þar og sjóða eitthvað saman á einhverri brún.

Jæja þriðja mannvirkið var svo einhver hluti af stálverksmiðju og fór ég þar upp í ca. 80 m hæð.  Það var mjög fínt þegar maður var kominn upp og afar áhugavert að labba upp stigana sem voru hengdir utan á. 

Læt fylgja með myndir af þessu ævintýri mínu, sem einhverjum þykir kannski ekki merkilegt, en mér fannst það! Hananú

Maður fer í ferðalag í tíu daga, fyrst til Íslands og svo til Þýskalands, þegar maður kemst aftur i samband við umheiminn eftir góða hvíld frá tölvum og sjónvarpi þá er allt hrunið.  Alveg ótrúlegt, það merkilegasta er að þeir sem hafa stjórnað peningastefnunni sl. ár séu enn við völd (ríkisstjórn, seðlabankahratið & bankastjóranir).  En hva…..ég ætla nú ekkert að tuða um þetta….þið gerið það örugglega nóg í vinnunum ykkar…….þó langar mig bara rétt að benda á að þetta er nú ekki alveg bersti tíminn til þess að vera í námi í útlöndum….allavega ekki þegar maður er svona háður þessu klinki sem við höfum.   

Í gærkveldi þá var norska krónan komin í 20 kr (þetta var áður en þeir festu gengið eða hvað það er kallað).  Það þýðir það að leigan mín hækkaði um ca. 35.000 kr á 10 dögum…geri aðrar þjóðir betur. 

Þá má nefna til ,,gamans” að núna kostar bjór á bar ca. 1400 kr. Mjólkurlíterinn er ca. 250 kr. Brauð er ca. 450 kr.  Þá eru 500 gr af hakki komin í 1100 kr. 1,5 L af kóki er nú ca. 340 kr.  Það er ljóst að ég þarf að hugsa íbúðarmálin mín fljótt og spurning hvort ég flytji sem fyrst ef það er möguleiki, ég hef ekki áhuga að borga þá upphæð í leigu sem ég gæti leigt risíbúð með kokki, þjóni og bílsjóra í New York fyrir.

Þýskaland

Það kom mér á óvart hvað það var áhugavert og skemmtilegt að fara á svæði sem ég vissi lítið sem ekkert um og er ekki mjög þekkt fyrir Íslendingum (að ég held).  Það sem við skoðuðum þarna voru m.a. risastór gömul iðnaðarsvæði, þar sem kol voru framleidd og stál.  Þessi svæði hafa svo verið opnuð og notuð sem almenningsgarðar.  Verksmiðjunar hafa fengið að standa og getur fólk farið um hluta þeirra og svo hefur ýmislegt verið gert fyrir svæðin.

Þetta var því hin ágætasta ferð og lærdómsrík, en ég ætla ekki að skrifa meira í bili

 Á næstu dögum kem ég með brot af því sem ég gerði þarna suður frá   Ætla nú ekki að gefa frá mér allar hugmyndirnar.

Snjór, slydda & frost……………

…..er partur af því sem ég fékk beint í æð meðan ég var á Dalvík.  Í morgun var nefnilega hvít jörð en það hefur líklegast horfið fljótlega.  Mér þykir þetta kannski aðeins of snemmt en ætli þetta sé ekki eitt af þessum stuttu kuldaköstum sem við fáum á haustin.  Annars var mjög gott á Dallas og náði ég að gera margt skemmtilegt þar.

Þessi vika hefur verið frábær, svo góð að ég ætla ekki að pikka það á ,,blað”.  En þessir Íslandsdagar eru senn á enda, ég fer í fyrramálið til Noregs….svo strax til Þýskalands.  Það var voða gaman að hitta fólk og heyra í fólki, hverrar krónu virði. 

Best að tjá sig aðeins um flugvélamatinn, sem ég hafði áhyggjur af í síðustu færslu.  Nú stóð veislueldhúsið sig bara nokkuð vel, því hef ég ákveðið að gefa Okurleiðum smá séns, enda get ég svo sem ekkert annað gert!  Það var hádegismatur og var boðið upp á hluta úr kjúklingabringu með kartöflusalati, brauð með.  Þá var einnig gefið skyr.is.  Af flugvélamat má gefa þessari máltíð fjögur klöpp af fimm mögulegum.

Ég ætla nú ekkert að vera að þylja upp hvað ég hef eitt tíma mínum í hérna, en ég hef bara notið þess að vera heima.  Til að nefna eitt þá varð Hugi Baldvin 4 ára og var haldið sjóræningja afmæli, svaka stemming þar.  Það er varla að maður ,,nenni” aftur út, en ætli það sé ekki best að halda áfram? 

Það borgar sig ekki að tjá sig um norsku krónuna og alla þessa vitleysu í efnahagslífinu…..það er bara niðurdrepandi…..engu að síður held ég að rétt sé að reka alla þessa sauði úr Seðlabankanum og helst úr landi.  Sama má gera við þessa ríkisstjórn.  Þetta getur nú ekki talist vera klárt fólk nema í því að skapa vandræði og leiðindi.

Núna fer ég til Duisburgar í Þýskalandi og ætla að vera þar í fjórar nætur…….þangað til næst…hafið það gott.

Jæja það er mikið um fjárfestingar hérna hjá íslensku námsmönnunum í Osló.  Þessar fjárfestingar munu ekki gefa mikið af sér í arð, allavega ekki í hagnaði, en þær munu skila sér í mikilli gleði og hamingju (eða það vona ég, haha).

Einu sinni á önn er alltaf farin ferð með stóra áfanganum sem maður er í, oftast til ,,útlanda”.  Þetta er svakalega skemmtilegt, auðvitað, en maður þarf að punga út fyrir þessu.  Jæja blessuðu kennararnir breyttu aðeins dagskránni, í stað 5 daga ferðar verður hún 3 dagar.  En það hentaði nú aldeilis vel, því glöggir menn sáu smugu á að geta eitt meiri peningum við þetta tilefni. 

Bekkurinn minn er sem sagt að fara til Þýskalands og verður dagskrá frá föstudeginum 3. október til sunnudagsins 5. október.  Nánar til tekið til borgar sem heitir Duisburg, rétt norðan við Dusseldorf.  Þar munum við skoða Emscher svæðið. 

Þá var allt í einu komin svaka eiða sem ég og Vignir vissum ekkert hvað gera ætti við.  Heyrðu jú förum til Íslands, hittum fjölskyldurnar sem við höfum saknað einstaklega mikið hérna.  Er það ekki annars rétt hjá mér Vignir, að þú sért með heimþrá haha?

Í dag voru svo flugin pöntuð (eða hluti af þeim) og vill ég þakka gömlu Flugleiðum fyrir að vera líklega með síbreytilegustu verð, uppfærð á mínútufresti, af öllum flugfélögum heims og einni fyrir að vera það flugfélag sem býður verstu kjör þegar maður tekur skyndiákvarðanir.  Til þess að komast til míns ástkæra heimalands þarf ég að byrja að fljúga með ,,samstarfsfélagi” Flugleiða gömlu til Kaupmannahafnar.  Það mun vera vegna þess að ég hef ekki efni á því að borga 101.354 kr fyrir aðra leiðina á Saga Class.  Mér skilst meira að segja að starfsmenn Kaupþings fái ekki að gera það lengur.

Jæja fimmtudaginn 25. sept ætlum við að fljúga til köben og svo þaðan með okurleiðum til Íslands og lenda um kl: 15 hundruð að íslenskum tíma.

Degi síðar ætla ég að fljúga með ,,barni” okurleiða, veit svei mér ekki hvað það á að kalla það glæpafyrirtæki.  Sem sagt til Akureyrar, þar sem að ég ætla loks að hitta hana Helgu mína og Huga Baldvin.

Þar ætla ég að vera þangað til á miðvikudag, þann 1. október og fljúga til Rvk.  Tæplega sólahring síðar (á fimmtudegi 2. okt) hitti ég svo Vigni aftur í Leifstöð þar sem að við fljúgum til höfuðborgar Noregs og lendum þar á hádegi. 

Þar munum við líklega bíða þar til seinnipartinn og fljúga frá Osló til Dusseldorf í Þýskalandi.  Þaðan er svo lest tekin í smá stund til Duisburgar, rétt norðan við Dussið.  Þar gistum við í þrjár nætur með kennurum og nemendum.  Ætli við gleypum ekki í okkur viskuna og verðum með öll skynfærin opin á þeim tíma.

Á sunnudeginum verður svo flogið frá Dusseldorf til Osló, seint um kvöld. 

Þegar ég lendi í Osló verð ég örugglega búinn að fá góðan skammt af útgjöldum, ferðalögum, flugvélum og Vigni, hahaha. En hva, maður er ungur námsmaður með fulla vasa af peningum og því engin vorkunn eða hvað?  En ef einhver ,,auðmaður” er eftir þarna heima og les þetta þá má hann glaður heyra í mér og styrkja þessi mikilvægu ferðalög Þau geta breytt ýmsu fyrir framtíð þjóðarinnar og hans, þá mun hann líklegast þakka mér innilega fyrir að hafa fengið að styrkja mig í gegnum þetta allt.   Þakka viðkomandi innilega vel fyrir, með fyrirfram þökk.

Sem sagt:

Osló – Kaupmannahöfn

Kaupmannahöfn – Keflavík

Reykjavík – Akureyri

Akureyri – Reykjavík

Keflavík – Osló

Osló – Dusseldorf

Dusseldorf – Osló.…………..það er best að skrifa ekkert um bíl- ,rútu- og lestarferðirnar sem munu verða farnar líka.

Í þessum pistli verður ekki farið í að reikna kostnað þessara ferða þar sem að það þarf löggiltan endurskoðenda/ur til þess að telja hvað það eru mörg núll fyrir aftan fyrstu töluna.  En hva gengið er svo gott þessa dagana.

Njótið vel og passið ykkur á flugfélögunum (þau eru ekki jafn sanngjörn og þau líta út fyrir að vera).

Ég og Vignir skelltum okkur til ÅS í gærdag , en það er 30 mín. ferðalag með lest hérna suðureftir.  Tilgangur ferðarinnar var að hitta Ragnar félaga okkar sem býr þarna og stúderar ásamt Hrafnhildi sinni sem er heima á Íslandi í sumarfríi.  Við áttum mjög góða stund saman, Ragnar grillaði fínan kanadískan lax handa okkur, fórum í skoðunarferð, töluðum og drukkum nokkra bjóra.

Áætlunin var að taka síðustu lestina heim um miðnættið, en við félagarnir vorum ekki alveg að nenna því svo við ákváðum að gista.  Ragnari dettur svo í hug að fara í hjólatúr út í sjoppu, sem við og gerðum.  Vignir var að vísu heima enda bara hættulegt fyrir hann að koma með.

Það var hjólað greitt niður hæðir í gegnum skógarrjóður og skipti engu máli þó að lýsing væri ekki mjög regluleg á leiðinni.  Þegar við höfðum hjólað út í sjoppu og byrjaðir að hjóla heim þá skeður það! 

Ég fer yfir gatnamót á svæði sem var ekki lýst upp, misreikna legu stígarins, hjóla á kantstein, svíf þvínæst upp í loft með hjólið á eftir og lendi á hægri öxlinni.  Niðurstaðan er að mér tókst að viðbeinsbrotna og er nú með svona stuðning við hendina og á bara að bíða eftir að þetta grói, sem það gerir á næsta mánuði. 

Það eru tvö ár núna í september síðan ég öklabraut mig í Bandý og nú viðbeinsbrotnar maður á hjóli, halló.  Því hef ég dregið þá ályktun að hentugast fyrir mig er að fara hægt yfir og koma göngutúrar  sterkir inn.

Annars vil ég þakka Ragnari fyrir skemmtilega kvöldstund og höfðinglegar móttökur.  Held að ég þurfi ekkert að fá hjólið hennar Hrafnhildar lánað næst þegar ég kem til  ÅS.

Bestu kveðjur frá Helga í fatla.