Þegar ég lá andvaka og veikur upp í rúmi í gærkveldi/nótt eftir tveggja daga legu og norðanrigningin berjandi á svefnherbergisgluggann eins og hún ætti eitthvað sökótt við húsið þá gat ég ekki hætt að hugsa um eitt mjög svo mikilvægt málefni.  Það er hvernig málsverðum sé háttað hjá forseta Bandaríkjanna, Obama, og fjölskyldu hans.

Hvernig ætli það sé fyrir venjulegan fjölskyldumann, sem hefur líklega verðir frekar sjálfsbjarga í gegnum tíðina, að flytja í nýtt hús og skipta um ham eins og snákur og aðlaga sig af öllum þeim siðum og reglum sem því fylgir?  Það sem er forvitilegast er maturinn, enda er það mín fíkn, sem ég dái og syrgi eftir aðstæðum.  Ég reikna fastlega með því að þarna séu starfsmenn í eldhúsinu.  Ætli það bíði hans morgunverðarhlaðborð þegar hann vaknar á morgnana eða fer hann bara í ísskápinn, skellir kornflexi í skál, skvettir mjólk útá og tekur banana með í hina hendina um leið og hann gengur að eldhúsborðinu.  Ætli hann geti komið með óskir á morgnana um hvað honum langi í kvöldmat um leið og hann kyngir niður morgunverðinum, t.d. kjöt í karrý.  Hvað ef að honum langar nú svo bara eitt kvöldið í pantaða pizzu og svo snakk og dýfu síðar um kvöldið um leið og hann les einhverja skýrsluna um þjóðaröryggismál Bandaríkjanna. 

Þetta eru vangaveltur sem að ég þyrfti nauðsynlega að fá svar við, best væri að geta spurt hann sjálfur en það er nú erfitt að komast að þessum manni.  Spurning um að sækja um sem gestakokkur í viku eða gera eitthvað merkilegt svo að hann vilji hitta mann, nóbelsverðlaunahafi….veit ekki…líklegast bara best að hætta um hugsa um svona bráðmerkileg málefni.

Jæja þetta eru mínar vangaveltur inn í helgina…ásamt nokkrum fleirum

Góða helgi, H

Það átti sko aldeilis að elda kvöldmat nú áðan.  Maginn galtómur og eldunarferlið átti að vera snöggt. Fyrir valinu var Findus fiskísúpa, súpa sem að leigusalinn minn gaf mér úr frystinum sínum.  Findus er s.s. sænskt vörumerki, svipað og 1944 heima, fyrir þá sem vita það ekki.  Ég hitaði súpuna, bætti 6 dl af vatni út í og hitaði.  Svo kom að því að smakka á herlegheitunum, oííí, þvílíkur vibbi….bragðið var ekki alveg það besta.  Ég er nú farinn að borða flest það sem lagt er fyrir mann eftir minn langa feril hér ofanjarðar, en þetta var ekki mikið skárra en pylsusúpan sem ég þurfti nauðsynlega að tala um fyrir ekki löngu síðan.  Það er greinilega ástæða fyrir að kallinn gaf mér þessa súpu, en hann sagði að þetta væri voða gott.

Mér er greinilega ekki æltað að borða súpur í þessu landi.  Þá eru nú 10-11 súpurnar hátíð sem við staffið í vinnunni fengum okkur stundum í vetur.

Jæja eitthvað varð ég að finna annað, því ég ætlaði ekki að gera mér það að borða þessa súpu.  Fór þá og náði í brauð og hálfgerðan gráðost o.fl. sem ég keypti í dag.  Nei gráðosturinn var svo blár og loðinn að ég sá lítið hvítt.  Ekki veit ég hvort að þetta hafi átt að vera svona, ostar eru mjög góðir og líka með smá myglu en þetta var ótrúlegt.  Ég þurfti því miður að henda gripnum áður en ég fattaði að mynd hefði verið skemmtileg í safnið.

Ef einhverjir hafa smakkað Findus fiskisúpu og líkað vel, þá er það gott og vel.  En annars eru margir þessir réttir alveg ágætir við svona aðstæður eins og maður lifir við í dag, stundum herramannsmatur.  Margir hafa það allavega miklu verra en ég í þessum heimi, því ég hef það bara allt of gott þannig að þetta var einungis jákvætt tuð.