Fór í stuttan GIS tíma í dag.  Kennarinn spurði hvort að hann mætti kenna á norsku og var þá horft á mig, ég játti því.  Já flott þá kenni ég þetta á sænsku sagði hann, en hann er sænskur kallinn.  Ég hef nú ekkert verið mikill aðdáandi sænsku en það er ekki mikill munur á kúk og skít þannig að þetta reddaðist auðvitað…enda er markmiðið að læra þessa snilld.  Ég vorkenndi greyið belganum hinsvegar sem kom of seint og gat því ekki mótmælt hvaða tungumál kallinn talaði.  Hann skildi ekki baun, en hann gat farið í draumalandið á meðan hann masaði á sænsku.

og hún er rúmlega hálfnuð, ekki slæmt það.

Ég hef nú ekkert verið að tjá mig hérna undanfarið og ætli það megi ekki skýra það af lægð sem gekk hér yfir, ekki var það veðrafyrirbrygði heldur frekar hugarástandið sem truflaði svona rosalega…held ég hafi ekki lent í þessu áður, reyni nú að vera frekar jákvæður…það er skemmtilegra.  Helsta skýringin á þessu falli er að fjarlægðin á milli landa hentar mér ekki alveg þar sem að ég vill fá að hitta mína nánustu oftar en gengur og gerist…..sem sagt að vera ekkert í öðru landi!  Hefur þetta lýst sér í einbeitingarskorti, svefnleysi og stanslausu urri á Vignir…..haha nei allavega ekki það síðasta (eða ég vona ekki Vignir minn).  Annars er hann lítið skárri og er þessi dvöl okkar án fjölskyldnanna með því erfiðara, allavega svo ég tala fyrir mig.  Best er þó að taka einn dag í einu og vera þakklátur fyrir það sem maður hefur og á….þannig að ég sé ljósið

Jæja nóg af tuði, þeir skynsömu skilja mig

Í vikunni áttum við að velja okkur lokaverkni sem við vinnum að fram að jólum, þetta er nokkur frjálst nema að maður verður að taka fyrir Groruddalinn og vinna að þeim vandamálum sem þar eru fyrir.  Það máttu vera tveir/tvö/tvær saman í hóp og ákváðum ég og Vignir að vinna saman, enda höfum við aldrei prufað það.  Það kemur svo í ljós hversu vel hann lætur af stjórn en ég vona það besta….hahaha….en annars þá verður þetta vonandi bara skemmtilegt verkefni og að nógu að vinna næstu vikurnar.  Í gær þurftum við svo að halda smá tölu fyrir kennarana og segja hvað við ætluðum að gera og færa rök fyrir því og tókst það nokkuð vel….held ég.

Annað kvöld ætlum við íslensku námsmennirnir í Osló að hittast og eiða kvöldinu saman, reikna með að það verði skemmtileg stund ……svo er það bara að læra um helgina og vera duglegur.

Hafið það gott þangað til næst

Jæja, mig langar nú bara heim í mitt gamla líf, það var svo rosalega fínt og gott.  Ætli fjarnám sé í boði, ég ætti kannski að athuga málið, ekki slæm tilhugsun, ha ?  Hér að neðan er færsla sem ég sá á ruv.is:

,,Íslenskir námsmenn í Noregi segja að neyð blasi við rætist ekki út með gengi krónunnar og möguleika á að taka út peninga. Dæmi eru um fólk sem aðeins hefur það sem er í eldhússkápnum og 500 norskar krónur, jafnvirði 1.500 íslenskra króna, að lifa af það eftir er mánaðarins. Útgjöld hafa tvöfaldast, reiknað í íslenskum krónum, á skömmum tíma. Í dag lokaðist fyrir úttektir af íslenskum reikningum í norskum hraðbönkum.”

Hér er þó væntalega átt við 50 No kr í stað 500 No kr  sem skrifað er í fréttinni.  Tekið af ruv.is / http://ruv.is/heim/frettir/frett/store64/item230775/

Jæja þá nú er maður búinn að gis-ast helling.  Það vita kannski ekki allir hvað GIS er, en það er stytting á a Geographic information system eða Lanfræðilegt landupplýsingarkerfi.  Allavega er hægt að segja þeim ,,lesendum” sem hafa áhuga á þessu námi að þetta eru fáir daga sem okkur er kennt þetta (eins og á Hvanneyri) en kennslan er mjög góð og fínn kall.  Þetta er mín skoðun!  Við fengum möppu með öllum fyrirlestrunum og haug af verkefnum, sem við gerum svo í tímunum.  Leiðbeiningarnar með verkefnunum eru mjög leiðandi og svei mér þá ef ég er bara ekki orðinn hrifinn af þessu forriti.  Ég hef alltaf vitað að þetta forrit getur gefið manni gífurlega möguleika, en ég ætlaði mér bara alltaf að hafa einhvern í þessu en kannski breyti ég þeirri skoðun núna, haha.  En þetta er eins og annað, ef maður notar þetta ekki þá gleymist það en þá á maður allavega þessi frábæru kennslugögn. 

Það er svo merkilegt með þennan skóla að við höfum fengið þessa fínu möppu og svo þvílíkt þykkt innbundið hefti (ca. 300 bls) í öðrum áfanga og maður þarf ekkert að borga.  Þessu er maður ekki vanur eða mig minnir svo :) 

Nú tekur svo við að gera GIS verkefni um Groruddalinn þar sem að hver hópur tekur ákveðið efni fyrir, safnar upplýsingum, kemur þeim fram á skýran hátt.  Þessi gögn eiga svo að nýtast síðar í haust þegar við hættum í rannsóknarvinnunni og förum í aðferðir og síðan í verkefnið sjálft.

Jæja góðar kveðjur, sjitt hvað þetta var nú leiðinlegt blogg.  Greinilega bara fyrir námsmenn sem hafa kynnst GIS-I.

Rakst á mynd af mér o.fl. frá Pang atburðinum, þetta er svo merkilegt að ég set tengilinn hér, haha.  Með mér þarna er norskur arkitektanemi á 1.ári og finnskur arkitektanemi á 5. ári. 

http://aho.no/no/AHO/Aktuelt/Nyheter/Bilder-fra-PANG-2008/

Í gær var engin kennsla í öllum skólanum, heldur var nokkurskonar workshop sem nefnist PANG.  Aðalatriði þessa árlega atburðar er að hrista alla saman og gefa fólki færi á að kynnast betur.  Dagurinn byrjaði kl: 10 á því að maður fór í ákveðinn hóp, sem var valinn fyrir mann.  Það voru ca. 70 hópar og áætlað að ca. 10 væru í hverjum hóp, en það mættu auðvitað ekki allir og sjá þeir kannski eftir því núna.  Hver hópur fékk fullt af bambus, ,,kartöfludúk”, snæri, lukt og rafhlöður.  Svo átti fólk að gera eitthvað verk þar sem að ljósið myndi fá að njóta sín þegar rökkva tæki.  Það var ótrúlegt hvað ýmsir hópar gerðu og mjög gaman að sjá.  Seinnipartinn var þessu svo hætt og svaka málsverður fyrir alla á skólalóðinni og auðvitað bjór.  Ég fann loksins ódýran bjór, aðeins 20 no. kr., á ,,skólapubbnum” (sérkennileg búlla það, en ekki slæmt verð).  Það var svo beðið eftir myrkvinu og hélt ég svo heim á leið þegar það var skollið á. 

Þetta var virkilega skemmtilegur atburður og gaf manni tækifæri að kynnast fleira fólki án þess að vera að tala bara um námið.  Það var vissulega heillandi um morgunin að vera bara heima og slaka á en ég sæi þá eftir því núna   Læt fylgja tvær myndir sem ég tók í dag en sumt sem hefur ,,aflagast” í nótt en þær sína þetta alveg nógu vel, best er að vera á staðnum til þess að skilja þetta

Á morgun fer svo allur dagurinn í rútuferð um Groruddalinn mikla, þar sem að hann verður skoðaður áfram frá ýmsum sjónarhornum.  Um kvöldið ætlar Félag íslenskra námsmanna í Osló að hittast við grill og blaður og ætlum við Vignir að kíkja á það blessaða fólk.

Í gær fór stór hluti af skólanum til Hamar, sem er tveggja tíma keyrsla í norður, á ráðstefnu um Landscape Urbanism today.  Helga sagði mér að Hamar væri vinabær Dalvíkur, ekki slæmt það

Það var lagt á stað kl. 7:30 í rútum og því vaknað mjög snemma til þess að missa ekki af rútunum.  Ég vissi ekkert hvar Hamar var en komst að því að þetta var tveggja tíma keyrsla, lengra en ég hafði búist við.  Þarna voru haldin góð erindi en í lokin voru sum erindin einfaldlega orðin langdregin og miður skemmtileg, því það var talað til kl. 18:30 takk fyrir.  Þar sem að dagskráin sjálf stóð í lengur en 8 klst, þá hefði maður áætlað að það yrði nú eitthvað um fínar veitingar og léttara hjal svona inn á milli en það gerist greinilega bara hjá Íslendingum.  Það var bara hvert klukkutíma erindið á eftir öðru og pylsusúpa í hádegismat.  Pylsusúpa já, þetta er mjög auðveld uppskrift og ef svo ólíklega vildi til að ég gæfi einhverjum svona að borða þá líkar mér líklega mjög illa við viðkomandi.  Þessi kjarngóða súpa samanstendur af vatni, grænmetisteningi, pylsum og blómkáli.  Ekki nóg með það, þetta vatn kostaði og brauðið aukalega. Þetta var að sjálfssögðu borðað, enda allir búnir að þrengja um eitt gat á beltinu.  Hefði betur sleppt þessum gæðamat, því maginn var mjög óánægður með þessa kássu og refsaði mér illilega nokkru síðar. 

Það var svo komið heim þegar klukkan var langt gengin í níu og þá settist ég niður með Vigni á næsta stað sem við fundum og fengum okkur öl.  Annars voru mörg erindin áhugaverð, sérstaklega þau sem voru flutt fyrir hádegi.  Það er bara alveg einkennilegt þegar fólk getur masað lengur en klukkutíma, þegar það hefði getað komið innihaldinu frá sér á mun styttri tíma.  Þá er það mín skoðun að sama hvað maður hefur mikinn áhuga á umræðuefninu þá situr maður ekki tímunum saman, enda gáfu augnlokin sig hjá ansi mörgum á tímum.  Ég og Vignir vorum sammála um það að ef þetta hefði verið gert á Hvanneyri, þá hefði allt orðið brjálað (enda rauk úr höfðinu á Vigni þegar þessu lauk og ég tók þetta út í hláturskasti).  En þetta er kannski bara misjafnt eftir þjóðum, við Íslendingarnir erum auðvitað svolítið dekraðir og stöndum fast á okkar skoðunum og réttindum. Læt fylgja þrjá myndir með, bara að klikka á þær ef þið viljið þær stærri.

Loksins er ég kominn með net hérna heima, sem ætti að geta bætt samskiptamöguleika mína mikið við umheiminn.  En auðvitað þurfti þessi skóli að aftra gleði minni og möguleikum til þess að fá að ,,leika” mér í tölvunni. 

Þessi blessaði kennari setti okkur fyrir tvö ,,lítil” verkefni í morgun, sem við eigum að skila og flytja á fimmtudaginn.  Sá gjörningur leiddi til þess að ég og Vignir ferðuðumst með öllum tegundum almenningssamgangna og gengum einnig óeðlilega mikið um efri byggðir Oslóborgar í dag. 

Annars ætla ég nú ekki að venja mig á það eða leggja það á ykkur að lesa um allt það sem gerist á mínum degi.  En þessu varð ég að koma frá mér til þess að komast niður á jörðina. 

Það má segja að við Vignir lærðum að telja oft upp að tíu í dag, á mörgum tungumálum.

Því frestast að koma með myndir af íbúðinni og svoleiðis mikilvægt þangað til síðar í vikunni, þökk sé kennara………

Ykkar, Helgi

Þessa setning kom upp í huga mér öðru hverju í morgun, enda var fyrsti skóladagurinn í dag.  Annað hvort er ég endanlega fallinn í djúp lífsgæðakapphlaupsins með efnahagshyggjuna að leiðarljósi, bara hugsandi um að fá hærri laun og meiri peninga til að eyða, eða að ég hafi hug á að láta eitthvað gott af mér leiða í þessum fræðum og geta haft áhrif á hin ýmisu atriði og fá að vera hluti í að skapa fjölskyldu sinni aukið öryggi? 

Ég vona svo sannarlega að ég falli undir seinni spurninguna annars get ég keypt mér miða strax heim, því það er nú hægt að færa rök fyrir því að maður hafi það alveg fínt og geti verið heima hjá sínum nánustu.

Annars gekk fyrsti skóladagurinn nokkuð vel miðað við allt og alla.  Þetta er skiljanlega svolítið sjokk að hlusta á ensku og norsku allt í bland og ætla heilanum að taka við þessari steypu.  Hugleiðingar mínar um að hafa bara tvö til þrjú tungumál í heiminum hugnuðust mér vel í morgun, annars veit ég að flestir eru mér ósammála í því.  Svona svipaðar pælingar eins og þegar mig langaði að afnema ypsilon í grunnskóla!

Fram að jólum verðum við í einum stórum kúrs (24 ects) sem samanstendur af 14 nemendum, 5 strákum og 9 stelpum.   Svo er einn ,,stuðningskúrs“ við þann stóra (6 ects), veit ekkert um hann ennþá.  Þessir 14 nemendur eru ýmist  landslagsarkitektanemar (9 stk) eða arkitektanemar (5 stk). Flest þeirra eru auðvitað norðmenn (10 stk), svo er einn frá Belgíu (franska hlutanum), ein frá Ítalíu en kemur sem skiptinemi frá Þýskalandi og svo að sjálfssögðu við Íslendingarnir (2 stk).  Aldursskiptingin er svona eins og við var að búast, Belginn er 20 ára (skil ekki menntakerfið þar) og restin af skaranum er frá 22 til 30 ára.  Ekki má gleyma Vigni blessuðum sem er er rétt rúmlega þrítugur eða eins og hann sagði við kynninguna á sér í morgun „I‘m very old“ og gaf enga tölu upp, við þetta uppskar hann mikil hlátrasköll.

Það þykir kostur við þetta ,,program“ að hér blandast nemar í arkitektúr og landslagsarkitektúr  mjög mikið í kúrsa.  Þannig munu mismunandi skoðarnir vonandi koma í ljós sem og ólíkir hæfileikar sem maður getur þá lært af.

Svo er ég kominn með norskt símanúmer: 00 47 948 11 983 (voðalega auðvelt, haha).

Þetta eru örugglega nægar upplýsingar fyrir ykkur í bili.

Góðar kveðjur, Helgi.